شکر قندی کے فوائد وخصوصیات

شکر قندی کے فوائد وخصوصیات

آلو جیسی شکل اور غذائیت رکھنے والی شکر قندی ایک جڑ ہے جو پاکستان میں عام پائی جاتی ہے ۔ یہ سردیوں میں ٹھیلوں پر بڑی تعداد میں فروخت ہوتی ہے جس سے نہ صرف بچے بلکہ بڑے بھی شوق سے کھانا پسند کرتے ہیں۔ اس کے میٹھے ذائقے کی وجہ سے اسے انگریزی میں sweet potatoeکہا جاتا ہے ۔ کم قیمت کی وجہ سے یہ امیر و غریب میں یکساں مشہور ہے ۔ خاص طور سے غریب طبقہ جو اکثر اناج کی کمی کی وجہ سے غذائی کمی کا شکار ہو جاتا ہے، شکر قندی کی کرشماتی خصوصیات سے اس کمی کو پورا کر سکتے ہیں ۔ شکر قندی کو بھون کر یا ابال کر کھا یا جاتا ہے۔ اس کا حلوہ بھی بے حد لذیز ہوتا ہے جو کہ جسم کو گرمی اور تقویت بخشتا ہے ۔ کالی مرچ اور نمک کے ساتھ اس کا استعمال اس کا مزا اور افادیت مزید بڑھا دیتا ہے ۔

سو گرام شکر قندی میں موجود غذائیت:

کیلریز: 86

فیٹس: 0.1گرام 0فی صد

سوڈیم : 55ملی گرام 2فی صد

پوٹاشیم : 337ملی گرام 9فی صد

کاربوہائیڈریٹس: 20گرام 6فی صد

پروٹین: 1.6گرام 3فی صد

وٹامن اے: 283فی صد وٹامن سی: 4فی صد

کیلشیم: 3فی صد آئرن: 3فی صد

وٹامنB6: 10فی صد میگنیشم: 6فی صد

شکر قندی کی خصوصیات

اس کی ان گنت خصوصیات کی وجہ سے اس سبزی کو سپر فوڈ کہا جاتا ہے ۔ یہ کئی بیماریوں سے محفوظ رکھتی ہے ۔ اس کے آٹھ حیران کن فوائد و خصوصیات مندرجہ ذیل ہیں:

دل کی بیماریوں سے محفوظ رکھتی ہے

آپ کو یہ جان کر حیرت ہوگی کہ شکر قندی میں وافر مقدار میں موجود وٹامن B6دل کو بیماریوں سے محفوظ رکھتا ہے ۔ یہ ہوموسیسٹین لیول کو کم کرتا ہے جو زیادہ تر دل کی بیماریوں کا سبب بنتا ہے ۔ ہوموسیسٹین کی زیادتی سے دل کی شریانیں سخت ہونے لگتی ہیں ۔ وٹامن B6ان شریانوں کو لچکدار بناتا ہے ۔ شکر قندی میں موجود پوٹاشیم دل کی دھڑکنوں کو ترتیب دینے میں مدد کرتا ہے ۔البتہ جو لوگ امراض قلب کا شکار ہیں وہ بغیر معالج کے مشورے کے شکر قندی کا استعمال نہ کریں  وٹامن اے سے بھرپور ہے

شکر قندی کا گہرا نارنجی رنگ اس میں موجود بیٹا کیروٹین یعنی وٹامن اے کی نشادہی کرتا ہے جو کہ ایک اہم اینٹی آکسیڈنٹ ہے ۔ ایک شکر قندی میں اتنا وٹامن اے موجود ہوتا ہے جو آپ کے جسم کی ایک دن کی وٹامن اے کی ضرورت کو پورا کر سکتا ہے ۔ وٹامن اے کئی قسم کے کینسر سے محفوظ رکھتا ہے ۔ اس کے علاوہ جلد کو سورج کی الٹرا وائلٹ شعاؤں سے بچاتا ہے ۔ شکر قندی میں پایا جانے والا بیٹا کیروٹین آنکھوں کے لیے بھی بے حد مفید ہے اور اس سے آنکھوں کی بینائی اچھی ہوتی ہے ۔

بلڈ شوگر لیول متوازن رکھتی ہے

کیروٹینائڈ کپاؤنڈز جسم میں انسولین لیول درست رکھتے ہیں جس سے خون میں شوگر کا لیول بھی ٹھیک رہتا ہے ۔ شکر قندی سے حاصل ہونے والا وٹامن B6ذیابیطس کے مرض سے بچاتا ہے۔ البتہ جو لوگ پہلے ہی ذیابیطس کے مرض کا شکار ہوں وہ شکر قندی کا استعمال محدود رکھیں ۔

 معدے کے السر کے لیے مفید

اگر کوئی معدے کے السر میں مبتلا ہو تو وہ شکر قندی کا استعمال ضرور کرے ۔ اس میں موجود فائبر معدہ صاف رکھتا ہے اور کھانا ہضم کرنے اور فاضل مادہ جسم سے خارج کرنے میں مدد کرتا ہے جس سے غذا کی نالی میں تیزابیت نہیں بنتی ۔ شکر قندی میں موجود کیلشیم ، پوٹاشیم، وٹامن بی ، وٹامن سی اور بیٹا کیروٹین السر ہونے کے خطرات سے بھی محفوط رکھتا ہے ۔

گردوں کے لیے فائدے مند ہے

وٹامن اے سے پھیپڑے کئی بیماریوں سے محفوظ رکھتے ہیں ۔ شکر قندی کے استعمال سے پھیپڑوں کی کئی بیماریوں جیسے امفیسیماemphysema سے بچا جا سکتا ہے ۔ ہارورڈ یونیورسٹی میں 124,000افراد پر ہونے والی ایک تحقیق سے ثابت ہوا کہ وہ لوگ جو باقائدگی سے ایسی غذا کا استعمال کرتے ہیں جس میں کیروٹینائیڈ موجود ہو ان میں پھیپڑوں کے کینسر کا خطرہ 33فیصد تک کم ہو جا تا ہے ۔

جلد اور بالوں کو صحت مند بناتی ہے

شکر قندی کو بیوٹی فوڈ بھی کہا جا تا ہے ۔ اس میں موجود غذائی اجزا جلد او ربالوں کے لیے بے حد مفید ہیں ۔ وٹامن سی ، وٹامن ای اور بیٹا کیروٹین کے اشتراک سے بننے والی شکر قندی جلد کو چمکدار بناتی ہے اور اس سے رنگ بھی صاف ہوتا ہے ۔ اس کے مستقل استعمال سے بال گھنے ہو جاتے ہیں اور ان کا جھڑنا بھی کم ہو جاتا ہے ۔

اعصابی قوت بڑھاتی ہے

شکر قندی کا استعمال دماغ میں موجود ٹشوز میں سوزش ہونے سے روکتا ہے ۔ اس سے فائبرونوجن لیول بھی کنٹرول میں رہتا ہے ۔ یہ جسم میں موجود ایک گلائیکو پروٹین ہے جس کی زیادتی سے انسان کے اعصابی نظام کو نقصان پہنچتا ہے ۔ شکر قندی میں پایا جانے والا پوٹاشیم ذہن کو نارمل انداز میں کام کرنے میں مدد کرتا ہے ۔

قوت مدافعت مضبوط بناتی ہے

ہر کوئی جانتا ہے کہ جسم کو قوت اور تقویت پہنچانے کے لیے آئرن کی ضرورت ہوتی ہے ۔ معدنیاتی فولاد نا صرف جسم کو انرجی مہیا کرتا ہے بلکہ اس سے جسم میں خون کے سفید اور سرخ خلیات تیزی سے بنتے ہیں ، ذہنی تناؤ دور ہوتا ہے اور قوت مدافعت مستحکم ہوتی ہے ۔ میگنیشیم کی وافر مقدار بھی اسے انرجی سے بھرپور بناتی ہے جس کے باعث ذہن پرسکون رہتا ہے۔

غرض یہ کہ اس سستی سی سبزی میں قدرت کے تمام غذائی خزانے موجود ہیں۔ یہ صحت کے لیے انتہائی مفید ہے۔ ان سردیوں شکر قندی کا استعمال ضرورکریں اور جسم کو چست و توانا رکھیں ۔